長短之間

進入一年的第四季，日夜溫差開始變得相當大，中午熱到出汗，夜晚卻涼到打顫。加上疫情反覆無常，作為父母真是頗為擔心小朋友的健康。

老婆用心良苦，叫兩隻馬騮夜晚瞓覺時，著返條長褲。

「我唔著長褲架！」細佬首先發難。

「我都唔著長褲架！」哥哥照跟。

「長褲！好痕架！」兩兄弟同步再重覆強調。

我加入戰團，軟硬兼施，還是未能成功。

面前是自己的兒子，我們當然理解。細佬自細有濕疹，皮膚唔乾都易痕；哥哥天生超敏感，有野掂住就周身唔自在。這兩個坐擁「踢被王」綽號的兄弟，床上再多的被子，每朝也是被踢得堆到床尾，就算使用防踢的小孩被袋，他們亦有能力鬆開，再踢飛床尾。天下間應該只有出世的時候，醫院那塊包布可以箍得住他們。

要他們著長褲？除非是外出，或是他們真的感到很凍主動要求，否則難過登天。

哥哥算是長大了，已經可以講道理，氹多兩氹還算是勉強肯著長褲睡覺，但細佬仍未成功。

今晚，就捉住細佬在梳化講數：

「阿鼻水先生，天氣真係開始凍，唔著番條長褲好易冷親㗎。」我帶點說笑，其實是懇求。

「呀～～！我唔著長褲！我要著短褲！」細佬用力以鄭嘉穎式大叫回答。

「但係，你而家流鼻水喎⋯」佢真係已經有兩行鼻水。

「我・唔・著・長・褲！」細佬索住鼻繼續堅持。

＊💡我突然靈機一觸💡＊

「OK！明白！唔著長褲就 OK？係咪？」我一手抬起細佬隻肥腳，一下手刀橫放到他的腳眼，示意長褲觸及的長度。

「係！」細佬也一下手刀橫放到腳眼同一位置。

「好！一言為定！Promise?」我大力點頭。

「Promise！」佢又大力點頭。君子協定，答應了就是答應了。

哈哈！少年，你實在是太天真了。

今日放工，立即衝去休閒衣服店，買了兩條三個骨褲！遮不到腳眼，起碼保得住大肶和膝頭的溫暖，好過晩晚短褲兩條腿凍到變雪條。當然我也選了褲筒比較鬆身的款式，沒太貼肌膚就應該不會太痕了罷。

夜晚，老地方梳化，細佬試褲，一穿上三個骨褲：

「條褲好長喎～～～～～」細佬拉個極長的「喎」投訴。

「呢條唔係長褲喎～～～」我又拉長個「喎」再加個手刀橫放在昨晚示意的腳眼位置。

「⋯⋯⋯⋯」細佬望住他那節肥嘟嘟露出來的小腿。

「嗱，係咪先？爸爸都 Promise 咗唔比長褲你著瞓覺。」我強調，褲腳和腳眼真的有一段距離。

「都係嘅⋯」細佬有點不願意，但 Promise 了就唯有勉強接受。他勢估唔到，世界上原來並非只有長褲和短褲。

哥哥食足全程花生，結尾一臉恍然大悟的表情。爸爸你好蠱惑呀。

這件軼事，的確擴闊了兩隻馬騮的視野。趁他們還在消化長短之間的可能性，我決定把這個話題，提升到哲學級數！

我一個閃身，入房借用老婆一條瞓覺專用，超級鬆身的喇叭型睡衣，一手展開然後問：

「小朋友，你地話，呢條係裙，定係褲？」我一邊問，一邊輕輕地搖擺，這件睡衣，垂下來的時候一塊闊布如裙，但卻偶爾清楚地露出兩條褲筒。

究竟係裙，定係褲呢？此刻兩兄弟的表情，和我看完《TENET》踏出戲院那刻一樣，定格地呆住了。

好！有請常識姐和霞姨！給這迷惘的兩兄弟解釋一下。😆