童言集：冇事！

隨著細佬長大，擺脫了只有食瞓痾的生活，也成了新一代童言集的攪笑軼事主角。

細佬和哥哥不同的，是比較粗枝大葉，加上他的天真笑容，走儍小子路線簡直入型入格。而基本上他也是從跌跌踫踫中長大，跌低、起身、跌底、再起身，就是他的生活方式。

雖然細佬大致明白大部分生活指令，但只是操流利「詞語」的他，說話方面暫時未能掌握句子組合。很多時候因為他未能了解問題句子的結構，就乾脆重覆最後的詞語，作出不經大腦的反射回答，所以近來常常出現以下一些對答：

問：「開唔開心？」細佬：「開心！」

我心諗：「噤就好！」

問：「好唔好味？」細佬：「好味！」

我心諗：「你個樣唔似噃⋯」

問：「眼唔眼瞓？」細佬：「眼瞓！」

我心諗：「喂！你鬼打噤精神喎！」

就一個多月前開始，發生了一件事，細佬有了一個新口頭禪。

＊場地：屋企主人房

＊年齡：兩歲

＊背景：有人頑皮，就是這樣簡單。

事源有個週末細佬頑皮走去跳床，而且是跳父母的高床，仲要冇人留意走漏了眼。

突然「嘭」一聲，我和老婆九秒九衝入房，見細佬跌在地上。好彩床尾的雜物卸去衝力，他只是跌跌撞撞地碌落地，目測並不是很傷。

我立即扶起他，緊張地問：「細佬有冇事？」

細佬一如以往反射地回應最後詞語：「冇事！」

我心諗：「你真係冇事？？」

細佬一聲也沒有哭出來，露出了一幅驚魂未定而又帶點興奮刺激的微妙表情。我驚過佢⋯

我再三煩氣確認：「細佬，真係冇事？」

細佬應該不太明白，但再答：「冇事！」

站在後面的老婆，沒好氣地看著兩個男子，雞同鴨講但又似模似樣的對話，只得無奈一笑，沒好氣地對我說：「小事咋，冇事啦。」

細佬見到父母的互動，可能覺得新奇又有趣，竟然故意把頭又再撞落地！然後哈哈大笑⋯我和老婆拼命阻止，細佬則再大叫：「冇事！」

自此之後，任何可以跌倒的地方，包括公園任何設施、屋企任何傢俬、突然出現的障礙物、甚至平地，當細佬仆低爬起身之後，我未開聲問，他已經堅定地，挺起胸膛答：「冇事！」。加上他通常會試多幾次跌多幾次才心息，堪稱是一個打不死無敵小神童。

意外可大可小，有時見他撞到腫起一片，還有些少血絲圍邊，明顯非常「有事」的時候，他仍然會儍笑地大叫：「冇事！」

充滿玩味的毒男爸爸，有時面對如斯情景之時，仍然忍唔住追問多句：

「開唔開心？」

痛到咪起雙眼的細佬仍然交足功課：

「開心！」

如果剛巧老婆在身後，相信「有事」的，反而會是我。