我會記得這個父親節

「爸爸返嚟啦！！」大仔成隻企鵝扭下扭下地衝入房。

「比你㗎，你拆啦。」然後拿著一袋東西衝返出來。

「你唔係有嘢要講咩？」媽媽從旁提醒。

「爸爸，父親節快樂！你拆啦。拆啦。」一隻儍企鵝在跳跳跳。

「多謝。乜嚟㗎？不如一齊拆吖。」

「食得㗎，食得㗎。」跟據毒男爸爸目測，膠袋裡有一塊麵包、一張卡、和一個小布袋。

一早知今天大仔有攪作。但始終公司還是遲了放工，乘的士火速回家也已經是晚上九時多。

「開呢個先。」大仔已經小心翼翼地拿出那塊方包，那是一塊用曲奇模造出來的 Hello Kitty，一大塊貓臉加上朱古力作眼和口。

「點解係 Hello Kitty？」送卡通公仔比我😅？

「貓嚟㗎。好攪笑㗎。你睇。呢⋯呢個係眼睛，呢個係鼻哥，係朱古力嚟㗎。好食㗎。」一邊說一邊已經挖下一隻朱古力眼放進嘴裏。

「佢一早已經想食。做這個的時候應該喺學校食咗唔少。」老婆笑著解釋。

「爸爸同我分享呀。」大仔向媽媽說，然後挖下另一隻朱古力眼睛⋯

平日大仔的作息時間是九時，今天他為了送這份禮物給我，頂住眼瞓等我回來，算是非常有誠意，就當賞朱古力佢食。兩仔爺一人一啖食完整塊 Hello Kitty 麵包，我最後也可幸地有一粒朱古力入口。見塊麵包被幾層膠袋包住，忍不住小聲問老婆知唔知塊包放了多久，她笑笑口說「時間應該唔短」。可能心理作用，我覺得麵包有點酸，但算了，因為我個心很甜。

「仲有㗎。」大仔抽出一張卡，手上還殘留一點溶掉了的朱古力。

「嘩！張卡好靚喎。」是一張裇衫形的自製父親節卡。

「似爸爸。」大仔指向我，因為我還一身返工 Look 未換衫。

「係喎，一樣喎。」我望望自己的裇衫。

「但係呢個太細『唔得著』喎。」（＊什麼是『唔得著』？詳細請看【童言集：唔得呀～】）

「係喎，太細件『唔著得』。」我一邊說一邊打開張卡。

「爸爸同我。」大仔指著裡面貼了父子早前學校運動會的合照。

「咦？媽媽同細佬呢？」我順便試試他怎說。

「媽媽照顧細佬，佢要食奶。」大仔走向媽媽搭著細仔的小肥腳。

突然間有點感觸。只是三年，大仔已經可以對答自如。面對大仔無邪地句句簡單直接，相比一個鐘前，在公司每句說話也得諗過度過，對比也實在太強烈了罷。回家也真是太好了，我吸了口氣，眼睛落在最後一件禮物。

「咦，這個是什麼？」我拿出了小布袋。

「返工袋囉。睇下。」大仔打開了袋子，展露出裡面放著的幾張報紙。

「嘩，啲報紙好整齊喎。」我很隨便說了。點知大仔答：

「唔係呀！係你啲公司嘢嚟㗎。我地之後可以一齊返工啦。」

「好提議喎。」我笑著，但其實很想喊。

「爸爸，父親節快樂。」大仔已經眼瞓到極點。

我慢慢抱起大仔，放他到床上。他很快就睡著了。

毒男爸爸，普通香港人一個，活在這個世界上出名壓力頂級的城市裡，生活必要有一定程度的取捨。為了幹活，可能要放棄一些家庭時間。但回到家裡，幾個大叉電機總會在旁：老婆、大仔、細仔。老婆常以身作則「身教」我，她總是正面又有笑容，總是全力 Charge Up 這頭家。她的儍笑確實很厲害，因為她的笑，比阿仔們更傻。而我總是很喜歡看。

有人說子女上小學後有了朋友圈就不會再黐實父母。近日看了些文章，說因為科技發達，小朋友接觸新事物太多太快，現正三歲已經可以不理你。吓？！三歲？那這次會否是最後一個黐身父親節？我真的希望大細仔，有朋友的同時，也會當我和老婆是朋友，就這樣一直同行，並一同成長。

阿大仔，我會記住你三歲父親節時，送了一塊令我有些肚痾的大臉 Hello Kitty 朱古力麵包比我。我一定會記住。